FA បានប្រកាសថាអ្នកចាត់ការ Liverpool លោក Jurgen Klopp ត្រូវបានចោទប្រកាន់ពីបទនិយាយប៉ះពាល់ដល់អាជ្ញាកណ្តាល Paul Tierney បន្ទាប់ពីជ័យជម្នះ ៤-៣ ទល់នឹង Tottenham កាលពីថ្ងៃអាទិត្យ។ ការ​ប្រកួត​ដ៏​ស្វិតស្វាញ​មួយ​នៅ​កីឡដ្ឋាន Anfield បាន​ជួយឲ្យក្រុមហង្សក្រហមទទួលបាន ៣ពិន្ទុដ៏សំខាន់ ដើម្បីបន្តក្តីសង្ឃឹមកៅអីលេង Champions League រដូវកាលក្រោយ។

លោក Klopp បានជាប់ពាក់ព័ន្ធក្នុងជម្លោះជាមួយអាជ្ញាកណ្តាល Tierney បន្ទាប់ពីគ្រាប់បាល់ទី៣ របស់ Spurs ក៏ដូចជាមន្ត្រីទីបួន John Brookes ពេលរត់ទៅអបអរគ្រាប់បាល់ជ័យជម្នះរបស់ Jota។FA បានបញ្ជាក់នៅក្នុងសេចក្តីថ្លែងការណ៍មួយថា Klopp ត្រូវបានចោទប្រកាន់ពីបទអត្ថាធិប្បាយនៅក្នុងសន្និសីទសារព័ត៌មានក្រោយការប្រកួតរបស់គាត់។

សេចក្តីថ្លែងការណ៍បានសរសេរថា៖     “លោក Jurgen Klopp របស់ Liverpool FC ត្រូវបានចោទប្រកាន់បន្ទាប់ពីការប្រកួត Premier League របស់ពួកគេជាមួយនឹងក្រុម Tottenham Hotspur FC នៅថ្ងៃអាទិត្យ ទី៣០ ខែមេសា។

វាត្រូវបានចោទប្រកាន់ថាការអត្ថាធិប្បាយរបស់អ្នកចាត់ការទូទៅទាក់ទងនឹងមន្ត្រីនៃការប្រកួតក្នុងអំឡុងពេលសម្ភាសន៍តាមប្រព័ន្ធផ្សព្វផ្សាយក្រោយការប្រកួត បង្កើតបានជាអាកប្បកិរិយាមិនសមរម្យ ដែលពួកគេបង្ហាញពីភាពលម្អៀង និង/ឬចោទសួរអំពីភាពត្រឹមត្រូវរបស់អាជ្ញាកណ្តាល និង/ឬជាការប្រមាថផ្ទាល់ខ្លួន និង/ឬនាំមកនូវការប្រកួតធ្លាក់ចូលទៅក្នុងភាពមិនសមរម្យ។

Jurgen Klopp មានរយៈពេលរហូតដល់ថ្ងៃសុក្រ ទី៥ ខែឧសភាដើម្បីផ្តល់ការឆ្លើយតប”៕