កាលពីយប់មិញក្លឹប Al Nassr បញ្ចប់លទ្ធផល ៩០ នាទីក្នុងជំនួបមិត្តភាពទល់ក្លឹបអេស្ប៉ាញ Celta Vigo មិនបានល្អនោះទេ ពោលចាញ់ ០-៥ នេះ Celta កន្លងមកក៏ធ្លាប់ជាក្លឹបដែល Cristiano Ronaldo រកបាន ៤ គ្រាប់/ប្រកួត គ្រា Real Madrid បំបាក់ ៧-១។
យ៉ាងណាងាកមកសម្រង់សម្តីរបស់តារាឆ្នើមចាស់វស្សាព័រទុយហ្គាល់ នៅតែបន្តមានជំនឿជាក់ថា គ្រប់យ៉ាងដែល Saudi Pro League ឬហៅកាត់ SPL កំពុងធ្វើ គឺជារឿងត្រឹមត្រូវ រួចបន្តទៅមុខ នឹងកាន់តែរីកសាយ ទទួលបានផ្លែផ្កាល្អជាងលីគកំពូលទួរគី និងហូឡង់ថែមទៀតផង។ នេះជាឆន្ទៈធំមហាសាល ដ្បិតអីសព្វថ្ងៃលីគទួរគីឈរលេខ ១២ ហើយលីគហូឡង់ឈរលេខ ៦ នៅចំណាត់ថ្នាក់ UEFA Ranking។
សំណួរចាក់ដោតពីអ្នកកាសែតដែលបានសួរ តើបុរសវ័យ ៣៨ ឆ្នាំ មានគំនិតគិតនឹងទៅចូលរួមនៅក្របខ័ណ្ឌសហរដ្ឋអាមេរិក Major League Soccer ដូចជាគូប្រជែង Lionel Messi ដែរឬអត់? ស្រាប់តែ Ronaldo ឆ្លើយ៖ “លីគកំពូលអារ៉ាប៊ីសាអូឌីតគឺល្អជាង MLS មើលចុះកីឡាករល្អៗជាច្រើន សំដៅមកចូលរួមនៅទីនេះ ត្រឹមតែមួយឆ្នាំទៀត នឹងប្រមូលផ្តុំទៅដោយកីឡាករកំពូលមិនខាន”។
“ខ្ញុំជាអ្នកបើកផ្លូវមក Saudi League ហើយក្រោយមកអ្នករាល់គ្នាក៏មកជាបន្តបន្ទាប់”។ ជាការពិតបើយើងសរុបកីឡាករ រួមទាំងអ្នកចាត់ការល្បីៗផ្ទេរមកថ្មីថ្មោង តួយ៉ាង Karim Benzema, N’Golo Kante, Jota, Marcelo Brozovic, Roberto Firmino, Kalidou Koulibaly, Ruben Neves, Edouard Mendy, Sergej Milinkovic-Savic និង Steven Gerrard ជាដើម ហើយក៏នៅផ្សារភ្ជាប់ចចាមអារ៉ាមបន្តកន្ទុយគ្នាផ្សេងទៀតដែរ។
បន្តទៅការនិយាយអំពីលីគល្អបំផុត CR7 បន្ថែម៖ “ខ្ញុំច្បាស់ ១០០ ភាគរយ នឹងមិនត្រលប់ទៅកាន់ក្លឹបអឺរ៉ុបណាទៀតឡើយ នេះខ្ញុំ ៣៨ ឆ្នាំហើយ ដោយពិតណាស់បាល់ទាត់អឺរ៉ុបបានបាត់បង់គុណភាពជាច្រើន រួចលីគតែមួយគត់នៅរក្សាភាពល្អដដែល គឺ Premier League ពួកគេនៅតែនាំមុខគេ”។
“ត្រឹមតែមួយឆ្នាំទៀត លីគអារ៉ាប៊ីសាអូឌីត នឹងយកឈ្នះទៅលើលីគទួរគី ក៏ដូចជាលីគហូឡង់ជាក់ជាមិនខាន ហើយកីឡាករមកទីនេះទាំងអស់ មិនក្រោមហេតុផលដូចដែលប្រធានសមាគមបាល់ទាត់អឺរ៉ុបលើកឡើងឡើយ ជាក់ស្តែង Jota&Ruben Neves ពួកគេសុទ្ធសឹងជាកីឡាករវ័យក្មេង”។
គួរឲ្យដឹងថា នេះជាការឆ្លើយតបរបស់ Ronaldo ទៅកាន់ប្រធាន UEFA ផ្ទាល់តែម្តង គឺលោក Aleksander Ceferin បាននិយាយកាលពីថ្ងៃអាទិត្យសប្តាហ៍មុន ថាបាល់ទាត់អារ៉ាប៊ីសាអូឌីតកំពុងដើរខុសផ្លូវ ត្រង់ពួកគេបែរទៅចាយលុយលើកីឡាករចំណាស់ៗ មិនព្រមយកលុយទៅបណ្តុះយុវជន ឬអភិវឌ្ឍធនធានកីឡាករដែលមានស្រាប់ ជារួមវាស្រដៀងទៅនឹងអ្វីដែលប្រទេសចិនធ្លាប់បានធ្វើខុស។
បើយើងទៅមើលចំណូលថ្មីព័រទុយហ្គាល់ទាំងពីរ ដូច Jota ដែលទើបចេញពី Celtic បានផ្ទេរទៅ Al-Ittihad ក្នុងវ័យ ២៤ ឆ្នាំ ខណៈ Ruben Neves ចេញពី Wolves បានផ្ទេរទៅ Al-Hilal ក្នុងវ័យ ២៦ ឆ្នាំ។ សរុបមកតើអ្នកយល់ឃើញបែបណាដែរ អំពីរបៀបដែល SPL កំពុងធ្វើ វាជារឿងត្រឹមត្រូវដែរឬយ៉ាងណា?