បន្ទាប់ឆ្លងកាត់ការជម្រុះចម្រាញ់ តាំងពីវគ្គចែកពូលអស់រយៈពេលជាងកន្លះឆ្នាំ ទីបំផុតយើងក៏សម្រេចយកបានក្លឹបទាំងពីរចុងក្រោយ បន្តឡើងមកប៉ះគ្នាដណ្តើមពានរង្វាន់ UEFA Champions League រដូវកាល ២០២២/២៣។
នេះគឺជាវគ្គផ្តាច់ព្រ័ត្រលើកដំបូងបង្អស់ក្នុងប្រវត្តិសាស្ត្របាល់ទាត់ ដែលក្លឹបអ៊ីតាលី Inter Milan ត្រូវជួបគ្នា តទល់ក្លឹបសំពៅមាស Manchester City មកពីអង់គ្លេស ដ្បិតអតីតកាលស្គាល់ជាតិសាកល្បងជើងទៅមកដែរ តែត្រឹមការប្រកួតមិត្តភាព ឬជំនួបត្រៀមបើករដូវកាល។
Inter បានយកឈ្នះ តាមរយៈការទម្លាក់ក្លឹបរួមទីក្រុង AC Milan ដោយលទ្ធផលទាំងពីរជើង ៣-០ ខណៈ City យកឈ្នះទៅលើគូប្រជែងចាស់ Real Madrid ៥-១ ឥតឲ្យវាយបក Comeback ត្រលប់មកវិញរួច ដូចកាលឆ្នាំចាស់ ២០២២។ កាលបរិច្ឆេទប្រកួត នឹងត្រូវធ្វើឡើងក្នុងកីឡដ្ឋាន Ataturk Olympic Stadium នៃទីក្រុង Istanbul ប្រទេសទួរគី នាវេលាម៉ោង ០២:០០ នាទីទាបភ្លឺ ឈានចូលថ្ងៃអាទិត្យ ទី ១១ មិថុនា ក៏នឹងមានផ្សាយបន្តផ្ទាល់លើទំព័រ CTS Sports។
គួរឲ្យដឹងថា នេះគឺជាលើកទី ២ ហើយសម្រាប់ក្លឹបម្ចាស់ដី Etihad ក្នុងការឡើងមកកាន់វគ្គផ្តាច់ព្រ័ត្រ ក៏ជាការបន្តបេសកកម្មចង់ស្គាល់ជាតិឈ្នះពាន UCL លើកដំបូងបង្អស់ ក៏ជាមួយរដូវកាលដំបូងនៃវត្តមានសមាជិកថ្មី គឺមនុស្សយន្ត Erling Haaland។ ចំណែកឯក្លឹបម្ចាស់ដី San Siro បានឡើងមកកាន់វគ្គនេះ លើកទី ៦ សម្រេចលទ្ធផល ៥ លើកកន្លងមក ឃើញថាឈ្នះជើងឯកដល់ទៅ ៣ សម័យ។
ក្រៅតែពីរឿងរ៉ាវខាងលើ យើងក៏ច្បិចលើកមកបង្ហាញនូវកំណត់ត្រាគួរឲ្យចាប់អារម្មណ៍ ២ ផ្សេងទៀតដែរ របស់កីឡាករ Bernardo Silva និងអ្នកចាត់ការក្លឹបខាងគូប្រជែងលោក Carlo Ancelotti។ សម្រាប់តារាឆ្នើមសញ្ជាតិព័រទុយហ្គាល់ បានក្លាយជាកីឡាករទីបីដែលអាចរកបាន ២ គ្រាប់ ឬច្រើនជាងនេះ ក្នុងវគ្គ ៤ ក្រុមចុងក្រោយទល់ Real Madrid ខកខានធ្វើបានតាំងជំនាន់ Lionel Messi នៅឆ្នាំ ២០១១ និង Robert Lewandowski នៅឆ្នាំ ២០១៣។
រីឯគ្រូសញ្ជាតិអ៊ីតាលី បានចារកំណត់ត្រាប្រវត្តិសាស្ត្រថ្មី ក្លាយជាអ្នកចាត់ការ ដឹកនាំការប្រកួតទី ១៩១ នៅក្របខ័ណ្ឌ UEFA Champions League ជាតួលេខត្រូវកត់ត្រាច្រើនជាងនរណាៗទាំងអស់ នេះបានបំបែកតួលេខចាស់របស់គ្រូតាលោក Sir Alex Ferguson ដឹកនាំត្រឹមប្រកួតទី ១៩០៕