លោក Farshad Khatiri ជនជាតិអ៊ីរ៉ង់ ដែលជាអ្នកផ្គូរផ្គងកីឡាករវាយក្នុងស្រុក និងក្រៅស្រុកដ៏ល្បីឈ្មោះ សន្មត់ថា ការប្រកួតរវាងកីឡាករគុនខ្មែរអ្នកលេងជង្គង់ទិព្វ ព្រំ សំណាង និងកីឡាករឃីកបុកស៊ីអ៊ីរ៉ង់ Arvin Mehboudi នឹងមិនមាននរណាម្នាក់សន្លប់ឡើយ ។ លោក Farshad ជឿជាក់ថា ការប្រកួតនេះ នឹងបញ្ចប់ទៅដោយពេញទាំង៥ទឹក។

«ខ្ញុំសង្ឃឹមថាការប្រកួតនឹងបញ្ចប់ពេញ ៥ទឹក»។ លោក Farshad Khatiri អ្នកផ្គូរផ្គងកីឡាករប្រដាល់ប្រចាំសង្វៀន រាចាដាំនឿន ប្រទេសថៃ ប្រាប់សារព័ត៌មានថ្មីៗ តាមសារអេឡិចត្រូនិក នៅថ្ងៃទី៤ ខែមេសា ឆ្នាំ២០២៣ ដូច្នេះ។ លោក Farshad អះអាងថា ការប្រកួតរវាងកីឡាករ ព្រំ សំណាង និង Arvin Mehboudi នឹងមិនមានកីឡាករណាសន្លប់នៅលើសង្វៀននោះទេ។

អ្នកផ្គូរផ្គងកីឡាករប្រកួតក្នុងស្រុក ​និងក្រៅស្រុករូបនេះ បាននិយាយថា៖«ព្រោះនេះជាការប្រកួតលក្ខណៈអាជីព ហើយយើងមិនអាចដឹងមុនបានទេថា វានឹងមានអ្វីកើតឡើង។ អ៊ីចឹង!មានតែរង់ចាំមើលការប្រកួតបញ្ចប់សិន»។ លោក Farshad បន្តថា ការប្រកួតនេះ នឹងអង្រួនអារម្មណ៍ទស្សនិកជន ។

លោក Farshad Khatiri និយាយថា៖«ពិតណាស់ ព្រំ សំណាង ជាកីឡាកររបស់ខ្ញុំពីមុនមកដែរ។ សំណាង ជាកីឡាករខ្លាំងពិតណាស់ ហើយគាត់គឺជាកីឡាករដែលមានបទពិសោធន៍ក្រាស់ក្រែល នៅលើសមរភូមិសង្វៀន ។ ចំពោះ Arvin គាត់ជាកីឡាករឃីកបុកស៊ីង និងជាអ្នកប្រដាល់ម៉ឺយថៃ(Muaythai) គាត់បុកហ្វឹកហាត់ខ្លាំងជារៀងរាល់ថ្ងៃ»។

គួបញ្ជាក់ថា ការប្រកួតរវាងកីឡាករ ព្រំ សំណាង និង Arvin Mehboudi នឹងប្រកួតនៅក្នុងកម្មវិធីប្រដាល់«មរតកគុនខ្មែរ NNP» ថ្ងៃទី៦ ខែមេសា ឆ្នាំ២០២៣ នាសង្វៀនប្រដាល់ថោន៕