នៅកម្ពុជា បើកាលណាគេនិយាយពីវិស័យប្រដាល់គុនខ្មែរ មហាជនពុំភ្លេចឡើយនូវស្តេចប្រដាល់កែងឆេះជង្គង់ហោះ អេ ភូថង ដែលលោកបានសាងប្រជាប្រិយភាពខ្លាំងនៅក្នុងវិស័យប្រដាល់គុនខ្មែរយ៉ាងល្បីល្បាញនាអំឡុងឆ្នាំ ២០០០ មកម្ល៉េះ
ហើយមកទល់បច្ចុប្បន្នលោកបានក្លាយជាផ្នែកមួយយ៉ាងសំខាន់នៅក្នុងសហព័ន្ធកីឡាប្រដាល់កម្ពុជា ព្រមទាំងជាគ្រូបង្វឹកគុនខ្មែរដល់យុវជនជំនាន់ក្រោយផងដែរ។
អ្វីដែលកាន់តែគួរឱ្យចាប់អារម្មណ៍ទៀតនោះ ដូចពាក្យចាស់លោកថា «ស្លឹកឈើជ្រុះមិនឆ្ងាយពីគល់» កូនៗចំនួន ៣ នាក់ របស់លោក អេ ភូថង បានសម្រេចចិត្តដើរតាមគន្លងឪពុកដែលមានឈាមជ័រជាអ្នកប្រដាល់ ព្រមទាំងមានឧបនិស្ស័យជាមួយកីឡាកម្ពុជា
ដែលបច្ចុប្បន្ននេះគេសង្កេតឃើញថា កូនៗ ៣ នាក់ ក្នុងចំណោមកូនទាំង ៤ របស់លោក កំពុងមានឈ្មោះបោះសំឡេងខ្លាំង ក្នុងវិស័យកីឡាប្រដាល់គុនខ្មែរ មានវត្តមានលើសង្វៀននៅក្រៅប្រទេស ព្រមទាំងបានចូលរួមក្នុងក្រុមជម្រើសជាតិ នាព្រឹត្តិការណ៍កីឡាស៊ីហ្គេម ២០២៣ ទៀតផង។
ជាក់ស្ដែងកូនប្រុសស្រី ត្រកូល “អេ” ទាំងបីរូប ដែលត្រៀមដណ្ដើមមេដាយជូនជាតិ ក្នុងព្រឹត្តិការណ៍ ស៊ីហ្គេម ២០២៣ មានដូចជា ៖
១. អេ យ៉ានុត កីឡាការិនីជម្រើសជាតិប្រដាល់សកលកម្ពុជា
២. អេ វីរៈខាំឈិត ភូថង (ម៉ឺន មេឃា) កីឡាករជម្រើសជាតិ កីឡា វ៉ូវីណាម
៣. អេ អាំម៉ារីន កីឡាករជម្រើសជាតិ កីឡា វ៉ូវីណាម នេះសរបញ្ជាក់ឱ្យឃើញថា កូនៗជំនាន់ក្រោយ ដែលមានឈាមជ័រស្តេចប្រដាល់កែងឆេះជង្គង់ហោះ កំពុងតែទទួលបានភាពជោគជ័យលើវិថីរបស់ខ្លួន ស្នងតំណែងឪពុកមិនឱ្យប្រិយមិត្ត ក៏ដូចជាអ្នកស្នេហាវិស័យកីឡាប្រដាល់គុនខ្មែរនៅកម្ពុជាអស់សង្ឃឹមនោះឡើយ៕
