បន្ទាប់ឆ្លងកាត់វគ្គជម្រុះចម្រាញ់អស់កាលជាច្រើនខែ ទីបំផុតយើងក៏សម្រេចរកបាន ២ ក្លឹប ឆ្ពោះមកការប្រកួតចុងក្រោយ ដណ្តើមពាន FA Cup ហើយសារនេះ ក៏ជាលើកដំបូងក្នុងប្រវត្តិសាស្រ្តពានមានអាយុកាលចំណាស់ជាងគេ ១៥២ ឆ្នាំ ដែលជំនួប Manchester Derby បានកើតឡើង។
បិសាចក្រហម Man Utd បានឆ្លងភាពតានតឹងទល់គូប្រជែង Brighton ដល់ថែមម៉ោងស៊ុតប៉េណាល់ទីកាត់សេចក្តី ទម្រាំរកឃើញអ្នកឈ្នះ ជាមួយលទ្ធផល ៧-៦។ រីឯសំពៅមាស City ហាក់ឆ្លងបានធូរ ទោះបន្ធូរដៃឲ្យ Sheffield ជាមួយការយកឈ្នះ ៣-០ កាលពីវគ្គមុន។ កាលបរិច្ឆេទជួបគ្នារវាងក្លឹបមកពីទីក្រុង Manchester ទាំងពីរ នឹងធ្វើឡើងនាវេលាម៉ោង ០៩:០០ នាទីយប់ ថ្ងៃទី ០៣ មិថុនា ក៏នឹងមានផ្សាយបន្តផ្ទាល់លើទំព័រ CTS Sports ម្ល៉េះក៏កុំភ្លេចចុច Follow ទុកស្រែកហ៊ោម្នាក់មួយឲ្យហើយទៅ។
និយាយអំពីការប៉ះគ្នានៅ Wembley លើកចុងក្រោយបង្អស់ គឺនៅខែសីហា ឆ្នាំ ២០១១ សារនោះ នាពានរង្វាន់ Community Shield ដែល United យកឈ្នះ City ៣-២ ពោលតាំងជំនាន់ លោក Sir Alex Ferguson នៅដឹកនាំ។ ចុះអ្នកមានឆ្ងល់ទេថា ហេតុអ្វី FA Cup សារនេះ ត្រូវអូសបន្លាយការប្រកួតមកដល់ខែមិថុនា? ដ្បិតតាមប្រវត្តិកន្លងមកច្រើនតែរកឃើញម្ចាស់ពាននៅខែមិនា មេសា ឬឧសភា។
បើយើងរំឭកទៅមុននោះកាលឆ្នាំ ២០២០ ក៏ធ្លាប់លើកពេលយូរបង្អស់ដល់ខែសីហាម្តងដែរ តែក៏ជឿបងប្អូនយើងបានដឹង ព្រោះស្ថិតក្នុងសម័យកាលជំងឺរាតត្បាត COVID-19 នេះមកដល់ឆ្នាំ ២០២៣ ស្ងាត់ស្ងៀមលែងបារម្ភដូចមុនទៅហើយ អ៊ីចឹងមកពីមូលហេតុអ្វីទៅ? ចម្លើយដោយខ្លី៖ គឺដោយសារតែប្រទាក់ក្រឡានឹងការលើកពេល World Cup 2022 នៅកាតារមកចុងឆ្នាំ ទើបរុញឲ្យកាលបរិច្ឆេទប្រកួតពានរង្វាន់នានា ត្រូវឡើងបន្តកន្ទុយគ្នាទៅតាមនោះ។
ក៏មានរឿងរ៉ាវគួរឲ្យចាប់អារម្មណ៍មួយផ្សេងទៀត ជុំវិញប្រាក់រង្វាន់លើកទឹកចិត្តដែលកីឡាករអាចទទួលបាន ដ្បិតថា United រដូវកាលនេះ អាចសល់ក្តីសង្ឃឹមត្រឹម ២ ពាន ចំណែក City អាចដល់ ៣ ពាន តែមិនទាន់សម្រេចមួយជាផ្លូវការនៅឡើយ។
តាមសារព័ត៌មាន Sportsmail ចុះផ្សាយថា កន្លងមកនៅជ័យជម្នះ Carabao Cup ឬ EFL Cup សមាជិកបិសាចក្រហមទាំងអស់ បានទទួលប្រាក់លើកទឹកចិត្តម្នាក់ ៦៥ ០០០ ផោន ឬប្រហែល ៨០ ០០០ ដុល្លារ ខណៈការឈ្នះ FA Cup ខាងមុខ បើក្លឹបអាចក្លាយជាម្ចាស់ពាន នោះក៏នឹងចែកប្រាក់រង្វាន់ ថែមម្នាក់ ១០៥ ០០០ ដុល្លារទៀត ជាទំហំប្រាក់លើកទឹកចិត្តស្មើការឈ្នះ ពាន Europa League។ ចំណែក Premier League បើអភិនិហារុញឲ្យ United លើកពាន នោះក៏នឹងទទួលបានប្រាក់បន្ថែមដែរ ប្រហែលម្នាក់ ៣១០ ០០០ ដុល្លារផ្សេងទៀត។
ងាកទៅសមាជិកក្លឹប Manchester City ឯណោះ គឺអាចទទួលបានខ្ពស់ជាង ហើយឱកាសសេសសល់ពានរង្វាន់ ៣ បើសម្រេចទាំងអស់ ក៏រំពឹងកើបប្រាក់សរុបចូលជាង ២ លានផោន។ ប្រាក់រង្វាន់ខ្ពស់បង្អស់គឺ UEFA Champions League ជាពានក្លឹបមិនធ្លាប់ស្គាល់ជាតិទាល់តែសោះ ធានាផ្តល់ជូន ១ លានផោនដល់កីឡាករមានឈ្មោះចូលរួម ហើយពាន Premier League អាចបានដល់ ៩០០ ០០០ ផោន និងចុងក្រោយ FA Cup អាចបានចន្លោះពី ១០០ ០០០ ទៅ ១៥០ ០០០ ផោន ឬប្រហែល ១២ ទៅ ១៨ មុឺនដុល្លារ ពោលជាទំហំប្រាក់ឧបត្ថម្ភខ្ពស់ជាងក្លឹបគូប្រជែង Man Utd៕
ប្រភព៖ បរទេស